Mart oxirida Yaponiyada Kyu-Sirataki temir yo‘l bekati tantanali tarzda yopildi, deya xabar bermoqda TJournal. U ushbu bekatdan har kuni maktabga qatnagan yagona yo‘lovchi qiz haqidagi hikoya tufayli mashhur bo‘lib ketgan edi.
Jadval bo‘yicha, poyezd ushbu bekatda kuniga to‘rt marta to‘xtagan. Bekat 69 yil davomida faoliyat ko‘rsatgan.
Kyu-Sirataki bilan birga, ushbu liniyadagi yana ikkita temir yo‘l bekati ham yopildi. Ulardan biri 84 yil, ikkinchisi 87 yil ishlagan.
Eslatib o‘tamiz, Yaponiya temir yo‘llari rahbariyati uch yil avval uzoq va ommalashmagan yo‘nalish bo‘ylab harakatni to‘xtatish haqida qaror qabul qilgandi. Biroq Kyu-Sirataki stansiyasida o‘quvchi qiz istiqomat qilishi ma’lum bo‘lganidan so‘ng, temiryo‘lchilar poyezdlar harakatini qisman tiklashga qaror qilgan.
Avvalroq 2016-yil martida qiz maktabni bitirishi, shundan so‘ng mazkur yo‘nalish bo‘ylab poyezdlar harakati butkul to‘xtatilishi aytilgan edi.
Izoh (0)