Hayotda muvaffaqiyatga erishgan ko‘plab insonlar erta turishni odat qilgan. Ular hamkasblari va raqiblariga nisbatan kunni ertaroq boshlash, ko‘proq ishlash, shu bilan birga, shaxsiy hayot uchun ham vaqt qoldirishni istaydi, deya hikoya qiladi Lifehacker.
Den Akerson, General Motors rahbari
Akersonning aytishicha, kamdan-kam 4:30—5:00 dan kech turadi. Saharlab ularda juda kech bo‘lib ketmasligi uchun GM’ning Osiyodagi vakolatxonasiga qo‘ng‘iroq qilishi lozim. U o‘zining hozirgi ishini murakkab, qiziqarli va o‘ziga tortuvchi deb biladi. Ba’zan hatto tuni bilan uxlamasligiga ham to‘g‘ri keladi. Yaxshiki, bu tunlar unchalik uzun ham emas.
Tim Kuk, Apple bosh direktori
Tim Kuk 4:30 turadi va dastlab pochtani ko‘radi. Soat beshda uni trenajyor zalidan topish mumkin. U ofisga birinchi bo‘lib kelib, oxiri ketishidan faxrlanadi.
Stiv Myorfi, Christie’s rahbari
Rodale nashriyotining sobiq rahbari shoir Uilyam Bleykning quyidagi satrlaridan ilhomlanadi: “Ertalab o‘yla, kunduzi harakat qil, kechki payt o‘qi va tunda uxla”. Shu iborani o‘qiganidan beri uning hayoti butkul o‘zgardi. Myorfining aytishicha, ertalabki mushohadalar uni strategik fikrlash va faol bo‘lishga undaydi.
Robert Ayger, Disney bosh direktori
Ayger soat 4:30 da turadi va tonggi vaqtini gazeta o‘qish, sport bilan shug‘ullanish, musiqa tinglash, elektron pochtani tekshirish va televizor ko‘rishga sarflaydi. U yuqoridagi ishlarning barini deyarli bir vaqtda qiladi.
Xeym Seben, Saban Capital rahbari
Asli misrlik bo‘lgan milliarder Xeym Seben 6:02da bir finjon qahva ichadi. So‘ng bir soat ishlaydi, keyin esa 75 daqiqa badantarbiya qiladi. Shundan so‘nggina uning kuni boshlanadi.
Padmashri Uorrior, Cisco texnik direktori
Padmashri Uorrior 4:30 da uyg‘onib, bir soatni pochta bilan tanishishga ajratadi. Keyin yangiliklarni o‘qiydi va o‘g‘lini maktabga tayyorlaydi. 20:30 da ham uni ofisdan topasiz. Avval u Motorola texnik direktori lavozimini egallagan va biznesdagi eng muvaffaqiyatli ayollardan biri deb topilgandi.
Andrea Yang, Avon Products rahbari
Andrea Yang 5:00 da turadi va sport zaliga jo‘naydi, soat sakkizda esa ish joyida bo‘ladi.
Xovard Shuls, Starbucks bosh direktori
Shuls kunni badantarbiyadan boshlaydi, odatda bu rafiqasi bilan velosipedda sayrdan iborat. Shunga qaramay, ertalabki oltidayoq ofisga keladi. Starbucks prezidenti Mishel Gass har kuni 4:30 turadi va yuguradi. 15 yildan beri shu ahvol. Balki hamma gap kofedadir?
Katta va kichik Jorj Bush, AQShning sobiq prezidentlari
Katta Jorj Bush soat to‘rtda turib, yugurish bilan mashg‘ul bo‘lar, oltida ofisga kelib, tungi ikkigacha qolib ketardi. Kichik Jorj Bush esa ofisga birmuncha “kechroq” — 6:45 da kelar va ko‘pincha shu paytda uchrashuvlarini o‘tkazardi. Uning jamoasi ham shunday ishlashga ko‘nikkandi: Kolin Pauell ofisga ertalabki oltida kelib, u yerda kechki yettigacha qolib ketgan. Kondoliza Rays esa ishga borguncha sportzalga ulgurish uchun 4:30 da turardi.
Izoh (0)