Qozog‘istonda aholining xorijiy valyutaga bo‘lgan talabi o‘n yil ichidagi eng past ko‘rsatkichgacha tushib ketdi. Bu haqda respublika Milliy banki raisi Doniyor Akishevga tayanib, “TASS” xabar berdi.
“Yanvar oyida valyuta ayirboshlash punktlarida aholi tomonidan bor-yo‘g‘i 213 million AQSh dollari sotib olingan, bu so‘nggi o‘n yil ichidagi eng past ko‘rsatkichdir. Fevral oyida esa tendensiya nafaqat kuchaydi, balki o‘z yo‘nalishini keskin tarzda o‘zgartirdi ham. Birinchi marta ayirboshlash punktlarining operatsiyalari saldosi, aholi xorijiy valyutani sotib olmaganini, balki undan ommaviy ravishda qutulganini ko‘rsatdi”, — dedi u.
Akishev, shuningdek, milliy valyutadagi bank omonatlari ko‘payganini aytdi, ular fevral davomida va martning birinchi yarmida 307 milliard tenge (890 million dollar)ga oshgan.
Milliy bank rahbari so‘zlariga ko‘ra, xorijiy valyutaga bo‘lgan talabning tushishi va tengega ishonchning ortishi yangi iqtisodiy sharoitlarga ko‘nikish davrining yakunlanganini bildiradi.
Izoh (0)