O‘zbekiston Markaziy saylov komissiyasining 28-mart kuni bo‘lib o‘tgan majlisida Toshkent viloyati hokimi Sodiq Abdullayevni Oliy Majlisi Senati a’zosi etib ro‘yxatga olish haqida qaror qabul qildi. Bu haqda MSK matbuot xizmati xabar berdi.
Xabar berishlaricha, mazkur qaror Toshkent viloyati davlat hokimiyati vakillik organlari deputatlarining bo‘shab qolgan o‘ringa O‘zbekiston Respublikasi Oliy Majlisining Senati a’zosi saylovi bo‘yicha 2016-yil 26-mart kuni o‘tkazilgan qo‘shma majlisi bayonnomasiga asosan qabul qilingan.
Toshkent viloyatining bir senatorlik o‘rni MSKning 4-fevraldagi qarori bilan bo‘shab qolgan edi. O‘shanda MSK xalq deputatlari Toshkent viloyati Kengashi deputati vakolati tugatilganligi munosabati viloyatning sobiq hokimi Ahmadjon Usmonovning senatorlik vakolatini muddatidan ilgari tugatgan edi.
Ma’lumot uchun, Ahmadjon Usmonov 4-fevral kuni Toshkent viloyati hokimi lavozimidan ozod etilgan, uning o‘rniga shu vaqtgacha viloyatning Zangiota tumaniga hokimlik qilib kelgan Sodiq Abdullayev tayinlangan edi.
Izoh (0)