Turkiyaning Eskishehir shahridagi “Esminyaturk” Sazova bog‘iga Buxorodagi Bolohovuz jome’ masjidining maketi o‘rnatildi. Bu haqda maketni o‘rnatgan “Turk dunyosi jamg‘armasi”ning Facebook’dagi sahifasida xabar berilgan.
Avvalroq “Esminyaturk” Sazova bog‘iga Samarqanddagi Mirzo Ulug‘bek madrasasi maketi o‘rnatilgani haqida xabar berilgan edi.
Ma’lumot uchun, Buxoro shahridagi me’moriy yodgorliklardan biri hisoblangan Bolohovuz masjidi qurilishi 1712-yilda boshlanib, oradan ikki asr o‘tganidan so‘ng yakuniga yetgan. Xususan, katta gumbazli masjidi 1712-yili, hovli va hujralari XIX asrda, ayvoni 1915—1917-yillarda, masjid yonidagi alohida turgan minora ham shu yillarda usta Shirin Murodov va usta Hafizov tomonidan qurilgan.
“Turk dunyosi jamg‘armasi” (Türk Dünyası Vakfı) jamoat tashkiloti Sharq mamlakatlarining madaniy merosini o‘rganish va asrash bilan shug‘ullanib keladi. 2015-yilning o‘rtalarida jamg‘arma tarafidan Eskishehir shahrida o‘ziga xos durdonalar bog‘i yaratildi. Unda O‘zbekiston, Mo‘g‘uliston, Qozog‘iston, Afg‘oniston, Hindiston, Bolqon davlatlaridagi yirik tarixiy me’morchilik obidalarining kichraytirilgan maketlari joylashtirildi. Bular qatorida O‘rxun bitiktoshlari, Toj Mahal va boshqalar bor.
Izoh (0)