Брюссель аэропортида ўзини портлатиб юборган худкуш террорчилардан бири Нажим Лаакравий бўлган, у ўтган йилнинг ноябрида Париждаги Bataclan клубига террорчилик ҳужумини уюштиришда ҳам гумон қилинган эди. Унинг шахсини Бельгия федерал прокуратураси тасдиқлади, деб ёзади «РБК».
Лаакравий ўзини Брюссель аэропортида Иброҳим ал-Бакравий билан бирга портлатган. Учинчи террорчи ҳамон қидирувда.
CBS News Бельгия полициясидаги манбасига таяниб хабар беришича, Лаакравийнинг ДНК намунаси Брюссель аэропортидаги портлаш юз берган жойда аниқланган.
Бельгия прокуратураси маълумотларига кўра, Лаакравийнинг ДНКси, шунингдек, Парижда 13 ноябрь кунги ҳужумларда қўлланилган бир нечта портловчи қурилмаларда ва Париждаги Bataclan клубида ишлатилган мато парчасида ҳам топилган.
Эслатиб ўтамиз, олдинроқ Брюссель аэропортидаги бомбани ака-ука Бакравийлар портлатгани хабар қилинганди.
Полиция маълумотларига кўра, аэропортдаги портлашга жами уч киши алоқадор бўлган, улардан икки нафари ҳалок бўлган, учинчиси аэровокзал биносидан қочиб қолган.
22 март, сешанба куни Бельгия пойтахтининг аэропорти ва метросида қатор портлашлар содир этилди. Натижада, сўнгги маълумотларга кўра, 36 киши ҳалок бўлди, 260 киши жароҳат олди.
Изоҳ (0)