Gollandiyaning “PSV” jamoasi bosh murabbiyi Filip Koku shogirdlari “Atletiko”ga qarshi tengma-teng o‘ynay olganidan faxrlanishini aytib o‘tdi. Kokuning so‘zlaridan UEFA rasmiy sayti iqtibos keltirmoqda.
Eslatib o‘tamiz, 15-mart, seshanba kuni “PSV” Yevropa Chempionlar Ligasi nimchorak final javob uchrashuvlari doirasida Madridda “Atletiko” mehmoni bo‘ldi. O‘yin asosiy va qo‘shimcha vaqtida 0:0 hisobi qayd etildi, penaltilar seriyasida esa “Atletiko” aniqroq harakat qilib, chorak final yo‘llanmasini qo‘lga kiritdi.
“Turli hissiyotlar og‘ushidaman. ‘Atletiko’ bilan tengma-teng o‘ynay olganimizdan faxrlanamiz. Taktik tomondan olib qaraganda, o‘yinimiz yaxshi chiqdi. Boshqa tomondan esa penaltilar seriyasida mag‘lub bo‘lish doimo alamli”, — dedi Filip Koku.
“Lyuk de Yong har ikki oyog‘ida og‘riq sezgani uchun, uni almashtirdim. Shuningdek, Andres Guardadoda ham muammolar bo‘ldi. Boisi, ikkinchi bo‘limda “Atletiko” o‘z sxemasini o‘zgartirib, ishimizni qiyinlashtirdi. Yannik Karrasko ko‘proq qanotlarda harakatlana boshlagandi. Shu boisdan beshta himoyachi bilan o‘ynaganimizga qaramay, chap qanotimizda bir qator muammolarga duch keldik”, — dedi “PSV” bosh murabbiyi.
“Agar bitta gol urib olganimizda, ‘Atletiko’ ikkita urishiga to‘g‘ri kelardi. Bu borada omad bizga halal bermagan bo‘lardi, biroq hujumda ko‘ngildagidek o‘ynay olmaganimiz uchun gol urolmadik”, — deb fikrini yakunladi “PSV” ustozi.
Avvalroq “Atletiko” bosh murabbiyi Diyego Simeone “PSV”ga qarshi o‘yindan keyingi fikrlari bilan o‘rtoqlasharkan, uchrashuv arafasida penaltilar borasida alohida tayyorgarlik bo‘lmaganini aytib o‘tgandi.
Izoh (0)