Braziliyaning Petrobras kompaniyasidagi korrupsiya bo‘yicha tekshiruvga to‘sqinlikda ayblanib, o‘tgan yil noyabrida hibsga olingan senator Delsidiu Amaral o‘ziga chiqariladigan hukm yengillatilishi evaziga mamlakat prezidenti Dilma Russeff va uning o‘tmishdoshi Luis Inasiu Lula da Silvaga qarshi ko‘rsatma berdi. Bu haqda “TASS” xabar qilmoqda.
Amaralning da’vo qilishicha, Russeff Petrobras kompaniyasidagi korrupsiya bo‘yicha ishga aralashish va maxsus operatsiya davomida qo‘lga olingan ayblanuvchilarning ozod etilishiga harakat qilgan. Lula da Silva esa jinoiy guruhning boshqa a’zolariga qarshi ko‘rsatma bermasligi uchun 12 yillik qamoq jazosiga hukm qilingan kompaniyaning sobiq top-menejeri Nestor Serveroga pul to‘lashni taklif etgan.
Ma’lumot uchun, Petrobras davlat kompaniyasidan bir milliard dollar atrofidagi mablag‘ o‘marilishi bilan bog‘liq ish doirasida 2014-yildan beri bir necha yuqori martabali mansabdor izolyatorda saqlanmoqda va tergov bilan hamkorlik qilmoqda. Jinoiy ish qatnashchilari orasida 60 dan ziyod siyosatchi, jumladan, sobiq va amaldagi parlament a’zolari, partiya yetakchilari, gubernatorlar bor.
Izoh (0)