Rossiya Suriyadan qo‘shinlarini olib chiqishi haqida AQShni oldindan ogohlantirmagan. Bu haqda Oq uy vakili Josh Ernest ma’lum qildi, deya xabar beradi “Interfaks”.
“Rossiya AQShga mazkur qaror haqida to‘g‘ridan-to‘g‘ri ogohlantiruv jo‘natmagan. Biroq, xabaringiz bor, prezident Obamada, oldindan rejalashtirilganidek, prezident Putin bilan telefon orqali bog‘lanish va Suriya hamda Ukrainadagi vaziyat borasida muhokamani davom ettirish imkoniyati bo‘lgan. Rossiya rahbariyatining qarori Suriyadagi vaziyat va qarama-qarshi tomonlarning muzokaralariga qanday ta’sir o‘tkazishiga baho berishga hali erta. Rossiya ushbu muzokaralarda samarali rol o‘ynashda davom etsa, bu Suriya xalqi, mintaqa mamlakatlari, shuningdek, AQSh va Rossiya uchun yaxshi yangilik bo‘ladi”, — deya ta’kidlagan Ernest.
Eslatib o‘tamiz, oldinroq Rossiya prezidentining matbuot kotibi Dmitriy Peskov Rossiya kontingentining Suriyadan olib chiqilishi muzokaralar natijasi emas, balki prezident Vladimir Putinning qarori bo‘lganini bildirgandi.
Izoh (0)