O‘zbekistonlik iste’doli tennischi Nigina Abduraimova Avstraliyaning Port-Piri shahrida davom etayotgan ITF turkumidagi tennis turnirining yakkalik bahslari ikkinchi davrasida mag‘lubiyatga uchradi. Bu haqda Xalqaro tennis federatsiyasi rasmiy sayti ma’lum qildi.
21 yoshli Abduraimova mezbon tennischi Jessika Murga qarshi bahs olib bordi va 4:6, 6:7 hisobida imkoniyatni boy berdi.
O‘zbekistonlik tennischi endi juftliklar bahsida o‘z ishtirokini davom ettiradi. Chexiyalik Barbora Stefkova bilan tandem hosil qilgan Abduraimova ilk uchrashuvda yaponiyalik Kyoka Okamura va xitoylik Ran Tian juftligi ustidan 6:3, 6:3 hisobida g‘alaba qozongandi. Yarim final yo‘llanmasi uchun Abduraimova/Stefkova juftligi Chi-Yu Su (Xitoy Taypeyi)/Shanel Simmonds (JAR) duetiga qarshi kortga chiqadi.
Ma’lumot uchun, Nyrstar Port Pirie Tennis International musobaqasining sovrin jamg‘armasi 25 ming AQSh dollarini tashkil qiladi.
Izoh (0)