Xitoydagi Yunnan Wild Animal Park hayvonot bog‘i tashrifchilari muassasada saqlanayotgan ikki tovus bilan azbaroi ko‘p suratga tushganidan jonivorlar olamdan o‘tdi, deb xabar beradi Daily Mail nashri.
Aytilishicha, tomoshabinlar tovuslarni qo‘lma-qo‘l uzatib, suratga olavergan, hatto ayrimlar ularning dumlaridan esdalikka patlarni yulib olgan.
Qushlardan biri 12-fevral kuni halok bo‘ldi. Hayvonot bog‘i ma’muriyati vakilining so‘zlariga qaraganda, tovus qo‘rquvdan va og‘riqli shokdan nobud bo‘lgan.
“Odamlar uni suratga tushish uchun tutib olib, ayrimlar hatto dumidan patlarini kuch bilan yulib olgan”, – ta’kidladi muassasa vakili.
Shundan so‘ng bog‘ ma’muriyati bayonot tayyorlab, unda ba’zi mijozlarning xatti-harakatlarini tanqid ostiga oldi. Shunga qaramay, 15-fevral kuni yana bitta tovus olamdan o‘tdi.
Voqea yuzasidan qo‘shimcha taftish o‘tkaziladi.
Yunnan Wild Animal Park’da 6800 tovus saqlanadi. Ular orasida noyob oq tovuslar ham bor. Qushlar bog‘ning butun hududida, odamlar orasida bemalol yuradi. Bu bilan bog‘ ma’muriyati tashrifchilarda tabiat bilan uyg‘unlik hissini uyg‘otishni maqsad qilgan.
Izoh (0)