Хитойдаги Yunnan Wild Animal Park ҳайвонот боғи ташрифчилари муассасада сақланаётган икки товус билан азбарои кўп суратга тушганидан жониворлар оламдан ўтди, деб хабар беради Daily Mail нашри.
Айтилишича, томошабинлар товусларни қўлма-қўл узатиб, суратга олаверган, ҳатто айримлар уларнинг думларидан эсдаликка патларни юлиб олган.
Қушлардан бири 12 февраль куни ҳалок бўлди. Ҳайвонот боғи маъмурияти вакилининг сўзларига қараганда, товус қўрқувдан ва оғриқли шокдан нобуд бўлган.
«Одамлар уни суратга тушиш учун тутиб олиб, айримлар ҳатто думидан патларини куч билан юлиб олган», – таъкидлади муассаса вакили.
Шундан сўнг боғ маъмурияти баёнот тайёрлаб, унда баъзи мижозларнинг хатти-ҳаракатларини танқид остига олди. Шунга қарамай, 15 февраль куни яна битта товус оламдан ўтди.
Воқеа юзасидан қўшимча тафтиш ўтказилади.
Yunnan Wild Animal Park’да 6800 товус сақланади. Улар орасида ноёб оқ товуслар ҳам бор. Қушлар боғнинг бутун ҳудудида, одамлар орасида бемалол юради. Бу билан боғ маъмурияти ташрифчиларда табиат билан уйғунлик ҳиссини уйғотишни мақсад қилган.
Изоҳ (0)