Facebook kompaniyasi ijtimoiy tarmoqlarda virtual reallikni amalga oshirish uchun maxsus bo‘lim ochdi

Facebook kompaniyasida ijtimoiy tarmoqlarda virtual reallik (VR)ni ishlab chiqish bilan shug‘ullanadigan bo‘lim ochildi, deya xabar bermoqda “RBK” kompaniya saytiga tayanib.

“Biz Facebook’da ijtimoiy VR bo‘yicha jamoa yaratdik va VR bo‘yicha bo‘lajak ijtimoiy hamkorlikni o‘rganishga diqqat qaratamiz. Ushbu jamoa bugungi kundagi VR texnologiya yordamida muloqot qilish va axborot almashish yo‘llarini, shuningdek, uni rivojlantirish bo‘yicha uzoq muddatli istiqbollarni tadqiq etadi”, — deyiladi bayonotda.

Kompaniya ta’kidlashicha, kelajakda VR aloqaning yanada ko‘proq turlarini taqdim etadi. Bular, chunonchi, “dunyoning turli burchaklarida yashaydigan do‘stlar uchun vaqtni birga o‘tkazish va bir-birining yonida ekanligini his qilish imkoniyati”dir.

Facebook ushbu jamoa aytib o‘tilgan maqsadlarga erishish uchun Oculus va kompaniyaning boshqa guruhlari bilan hamkorlik qilishini ta’kidladi.