Samsung yangi flagmanlari — Galaxy S7 va S7 Edge’ni namoyish etdi, deya xabar bermoqda TJournal.
5,1 dyuymli Galaxy S7’ning dizayni avvalgi modelnikidan ko‘p ham farq qilmaydi: faqat barmoq izi datchigi va orqa kamera turtib chiqqan joy ancha yassiroq ko‘rinish oldi. Galaxy S7 Edge 5,5 dyuymli ekranga ega bo‘ldi, shuningdek, uning orqa korpusi biroz qayrilgan bo‘lib, bu uni qo‘lda tutib turish uchun qulaylik yaratadi.
Har ikkala smartfon ham IP68 standarti bo‘yicha namlikdan himoyalangan bo‘lib, ular 1,5 metrgacha chuqurlikdagi suvda yarim soatgacha turishi va hech qanday ziyon ko‘rmasligi mumkin.
S7 Edge’dan bitta barmoq orqali foydalanish qulayroq bo‘lishi uchun, Samsung o‘z dasturiy qobig‘iga yon menyuni qo‘shdi, u barmoq ekran bo‘ylab yurgizilganida o‘ng tomonda paydo bo‘ladi.
Smartfonlarning texnik xususiyatlari taqdimotdan avvalroq ma’lum qilingan edi. Samsung akkumulyatorlar hajmini S7’da 2550 mA/soatdan 3000 mA/soatgacha, S7 Edge’da 2600 mA/soatdan 3600 mA/soatgacha oshirdi. Shuningdek, kameralar avvalgidek 16 megapiksel emas, 12 megapikselli bo‘ldi, biroq ularning yorug‘likka nisbatan sezuvchanligi ortdi, bu suratlar sifatini oshiradi.
Izoh (0)