O‘zbekistonda 1-martdan kuchga kiradigan yangi tahrirdagi Yo‘l harakati qoidalarida (pdf)gi yangi talablardan biri avtomobilda tibbiyot qutichasi, o‘t o‘chirgich va avariyaviy to‘xtash belgisi bilan birga, nur qaytargichli maxsus jilet bo‘lishidir, deb yozadi “Gazeta.uz”.
Bu yengil va yuk avtomobili, avtobus va g‘ildirakli traktorlar haydovchilari uchun majburiy etib belgilandi.
Hujjatda transport vositasining haydovchisi majburiyatlari aks etgan bandlardan biri quyidagicha keltirilgan:
“Sutkaning qorong‘i vaqtida va yetarlicha ko‘rinmaydigan sharoitda majburiy to‘xtagan transport vositasining haydovchisi ta’mirlash maqsadida yo‘lning qatnov qismiga chiqishdan oldin nur qaytargichli maxsus jilet kiyib olishi” kerak.
IIV YHXBB vakillari avtomobilni yuqorida ko‘rsatilgan majburiy vositalar bilan jihozlashda sotib olinayotgan buyumlarning sertifikatlari mavjudligiga e’tibor qaratishni va sotuvchilardan mahsulot sifati haqidagi hujjatlarni talab qilishni tavsiya etadi.
Tibbiy qutilarni, yaxshisi, dorixonalardan xarid qilgan ma’qul. Sertifikatlarga ega tibbiyot qutisi, nur qaytargichli jilet, avariyaviy to‘xtash belgisi va o‘t o‘chirgich kiradigan maxsus komplektlarni nafaqat bozor va do‘konlarda, balki avtosalonlarda ham sotib olish mumkin.
YHXBB “O‘zavtosanoat” kompaniyasi bilan kelajakda respublikada ishlab chiqarilayotgan yangi avtomobillar komplektatsiyasiga tayyor to‘plamlarni kiritish borasida muzokaralar olib bormoqda.
Izoh (0)