Ўзбекистонда 1 мартдан кучга кирадиган янги таҳрирдаги Йўл ҳаракати қоидаларида (pdf)ги янги талаблардан бири автомобилда тиббиёт қутичаси, ўт ўчиргич ва авариявий тўхташ белгиси билан бирга, нур қайтаргичли махсус жилет бўлишидир, деб ёзади «Газета.uz».
Бу енгил ва юк автомобили, автобус ва ғилдиракли тракторлар ҳайдовчилари учун мажбурий этиб белгиланди.
Ҳужжатда транспорт воситасининг ҳайдовчиси мажбуриятлари акс этган бандлардан бири қуйидагича келтирилган:
«Сутканинг қоронғи вақтида ва етарлича кўринмайдиган шароитда мажбурий тўхтаган транспорт воситасининг ҳайдовчиси таъмирлаш мақсадида йўлнинг қатнов қисмига чиқишдан олдин нур қайтаргичли махсус жилет кийиб олиши» керак.
ИИВ ЙҲХББ вакиллари автомобилни юқорида кўрсатилган мажбурий воситалар билан жиҳозлашда сотиб олинаётган буюмларнинг сертификатлари мавжудлигига эътибор қаратишни ва сотувчилардан маҳсулот сифати ҳақидаги ҳужжатларни талаб қилишни тавсия этади.
Тиббий қутиларни, яхшиси, дорихоналардан харид қилган маъқул. Сертификатларга эга тиббиёт қутиси, нур қайтаргичли жилет, авариявий тўхташ белгиси ва ўт ўчиргич кирадиган махсус комплектларни нафақат бозор ва дўконларда, балки автосалонларда ҳам сотиб олиш мумкин.
ЙҲХББ «Ўзавтосаноат» компанияси билан келажакда республикада ишлаб чиқарилаётган янги автомобиллар комплектациясига тайёр тўпламларни киритиш борасида музокаралар олиб бормоқда.
Изоҳ (0)