Komik janrning eng yorqin aktyorlaridan biri bo‘lgan Robin Uilyams bir kadrda ham kulgili, ham qayg‘uli holatlarni mohirona aks ettira olardi. Aktyor hayot bo‘lganida, bu yil 74 yoshni qarshilardi. U unutilmas obrazlaridan tashqari, butun umri davomida mehribon inson rolini ijro etdi.
Robin Uilyams Stiven Spilbergni depressiyadan qutqarib qolgan
“O‘zga sayyoralik” filmi ijodkori Stiven Spilberg hayotining eng sermahsul davrlaridan birida juda holdan toyadi. Rejissyor bir vaqtning o‘zida “Yura davri parki” va “Shindler ro‘yxati” filmlari ustida ishlashga kirishadi. Bu filmlar bir-biriga qarama-qarshi bo‘lib, Spilberg ulardan birini sof insoniy tuyg‘ular bilan, ikkinchisini esa kinokompaniya talabi bilan suratga olmoqchi edi. Rejissyor Holokost haqidagi juda shaxsiy va og‘riqli hikoya hamda tiranozavrning jipni quvishi o‘rtasida ikkilanib qoladi.
O‘shanda Spilberg “Shindler ro‘yxati”ni Holokost shaxsiy tarixiga aylangan boshqa rejissyor — onasi Osvensimda halok bo‘lgan va o‘zi bolaligida Krakov gettosidan mo‘jizaviy tarzda omon qolgan Roman Polanskiga topshirishni o‘ylaydi. Biroq Polanski o‘sha paytda Ikkinchi jahon urushi mavzusiga yaqinlashishga tayyor emasdi. Spilberg ikkita og‘ir loyiha bilan yolg‘iz qoladi va uning ruhiy holati izdan chiqadi.
Spilberg Robin Uilyams bilan ancha oldin, uni “Kapitan Huk” filmida suratga tushishdan avval tanishgandi. Rejissyor va aktyor tez orada qalin do‘st bo‘lib qolishadi. Uilyams Spilbergning og‘ir ahvolini bilib, qo‘lidan keladigan ishni qiladi: do‘stini kuldiradi.
“Robin mening tashvishda ekanligimni bilardi va har hafta belgilangan vaqtda qo‘ng‘iroq qilib, telefon orqali 15 daqiqalik hazil-huzul qilardi. Men qotib-qotib kulardim, his-tuyg‘ularni chiqarib yuborardim. Men baland ovozda kulayotganimda Robin doim go‘shakni qo‘yib qo‘yardi. U hech qachon xayrlashmasdi, shunchaki men qah-qah urib kulganimda go‘shakni qo‘yardi”, deb eslaydi Stiven Spilberg.
Robin Uilyams Koko laqabli gorillani ham kudirgan
Koko laqabli gorilla noyob tur bo‘lgan. Olimlarning ta’kidlashicha, u ingliz imo-ishora tilini o‘zlashtirgan va Santa Krus qo‘riqxonasidagi nazoratchilar bilan muloqot qila olardi. Uni go‘dakligidanoq imo-ishoraga o‘rgatishgan va hayvon chinakam yulduzga, tabiat va inson o‘rtasidagi ko‘prikka aylangandi.
Robin Uilyams gorillaning hayotidagi eng qiyin davrda uning oldiga taklif etiladi. Koko uzoq vaqt davomida sherigi Maykl bilan yashagan, u o‘lgach tushkunlikka tushib qolgandi. Gorilla o‘zini yomon his qilayotgani va zerikayotganini imo-ishoralar bilan ko‘rsatib, ovqatdan bosh tortardi. Kokoning tushkunlik holati taxminan olti oy davom etgach, 2001-yilda nazoratchilar Robin Uilyamsdan uni kuldirish uchun yordam so‘rashadi.
Aktyor va gorilla o‘rtasidagi muloqot juda tabiiy tarzda kechadi. Gorilla stulda o‘tirgan Uilyamsning yoniga kelib, yerga o‘tiradi-da, uning qo‘lidan ushlab, yoniga taklif etadi. So‘ngra aktyorning ko‘zoynagini olib, taqib ko‘radi, keyin esa ko‘zoynakni Uilyamsga qaytarib beradi. Koko Robinga o‘rganib qolgach, unga o‘yin taklif qiladi: ular bir-birini qitiqlaydi, aktyor maymun oldida turli-tuman yuz ifodalarini ko‘rsatadi va ikkalasi ham qotib-qotib kulishadi.
“Biz bir-birimiz bilan g‘ayrioddiy narsani — kulgini baham ko‘rdik. Koko ingliz tilini tushunadi va mingdan ortiq ishoralarni biladi. Ular yordamida muloqot qiladi hamda odamlar bilan kundalik voqealar, hayot, muhabbat va hatto o‘lim haqidagi fikrlari va kechinmalarini o‘rtoqlashadi. Bu uchrashuv haqiqatan ham unutilmas bo‘ldi”, degan Robin Uilyams bu g‘ayrioddiy tajriba haqida.
2014-yilda Koko aktyor vafot etgani haqida xodimlarning suhbatini eshitib qoladi. U juda xafa bo‘lib, o‘zini nazarda tutgan holda “ayol yig‘layapti” degan ishorani ko‘rsatadi.
Robin Uilyams Disney’ga shart qo‘ygan
Robin Uilyamsga Disney’ning “Olovuddin” multfilmida Jinga ovoz berishni taklif qilganlarida, u dastlab ikkilanadi. Chunki studiya har qanday imkoniyatdan foydalanib pul topishini bilardi. Biroq keyinchalik aktyor o‘z shartlari asosida bu personajga ovoz berishga rozi bo‘ladi.
Uilyams taklif etilgan 8 million dollar o‘rniga 75 ming dollarga rozi bo‘ladi. Bu pulni u AQSH kino aktyorlari gildiyasiga berishga qaror qiladi. Faqat bir shart bilan — Disney keyinchalik Uilyamsning ovozi va qiyofasidan boshqa reklamalarida foydalanmaslikka rozi bo‘lsa. Biroq kompaniya boshqacha yo‘l tutadi: u fastfud va o‘yinchoqlar reklamasida Uilyamsning ovozidan yashirincha foydalanadi.
“Men faqat ovoz berishga rozilik bildirdim, xolos. Buni ulkan animatsiyaning bir qismi bo‘lishni xohlaganim uchun qilyapman. Farzandlarimga nimadir qoldirmoqchiman. Lekin bitta shartim bor: hech narsa sotishni istamayman”, degan aktyor qat’iy ohangda.
Natijada Uilyams o‘z ismi, imzosi va suratidan foydalanish huquqini xayriya tashkilotiga topshiradi. Shu yo‘l bilan u vafotidan so‘ng 25 yil davomida o‘zi ishtirok etgan hech qanday reklama paydo bo‘lmasligini ta’minlaydi.
Robin Uilyams Supermenga yordam bergan
Uzoq vaqt davomida kinoning asosiy Supermeni aktyor Kristofer Riv bo‘lgan. U kameradan tashqarida ham superqahramonga o‘xshardi: filmga olish paytida tryuklarni o‘zi bajarardi, otda chopardi, samolyotlarda uchardi, yaxta boshqarardi, xayriya ishlari bilan faol shug‘ullanardi. Keyinchalik u otdan yiqilib, bo‘yin umurtqalarini sindirib oladi. Natijada Rivning bo‘ynidan pastki qismi falaj bo‘lib qoladi, afsuski, bu holatni davolashning iloji yo‘q edi.
Riv Robin Uilyams bilan aktyorlik maktabidan beri do‘st edi. Dahshatli hodisa ularning do‘stligini yanada mustahkamlaydi. Rivning eslashicha, kasalxonaga uni birinchi bo‘lib Uilyams ko‘rgani kelgan. U shifokor kiyimini kiyib, g‘alati ruscha talaffuz bilan gapirgan va o‘zini proktolog deb tanishtirgan. So‘ng hazillar aytib, oxir-oqibat do‘stini kuldirgan.
“Men haqiqatan ham qiyin ahvolga tushganimda Virjiniyaga birinchi bo‘lib u keldi. Xudoga shukrki, o‘sha paytda bu kresloda xavfsizlik kamarini taqib olgan edim, aks holda uning qiliqlaridan kulib yiqilib tushgan bo‘lardim. Bunday fojia paytida ham... chinakam quvonch, kulgi va sevgini his qilish mumkin ekan”, deb eslaydi Riv.
Robin Uilyams Kristofer Rivga hayotga bo‘lgan ishtiyoqini yo‘qotmaslikka yordam berdi va do‘stining barcha tashabbuslari-yu intilishlarini qo‘llab-quvvatladi.
Izoh (0)