Ukraina delegatsiyasi BMT Xavfsizlik Kengashida Rossiya prezidenti Vladimir Putinning Ukraina chegaralarini shubha ostiga qo‘yuvchi, Donbass haqida aytgan fikrlari muhokamasini boshladi, deb yozadi “Korrespondent.net”.
Ukraina vakili Vladimir Yelchenko Rossiya oliy rahbariyatining Ukraina hududiy yaxlitligi, suvereniteti va siyosiy mustaqilligini shubha ostiga olgan holda, tarixni qayta yozishga urinishlarini nomaqbul deb atadi.
Ukraina delegatsiyasi ta’kidlashicha, “Putinning gaplari bir qator muhim xalqaro hujjatlar, xususan, BMT ustavi hamda 1975-yilgi Yevropada xavfsizlik va hamkorlik bo‘yicha Xelsinki majlisi yakuniy dalolatnomasiga zid keladi”.
Shuningdek, Ukraina delegatsiyasi Rossiya Qrim va Sevastopolni noqonuniy istilo qilishda hamda Donbassga mislsiz harbiy tajovuzni amalga oshirishda davom etib, Memorandum bo‘yicha majburiyatlarini buzayotganini ta’kidladi.
Shu munosabat bilan Ukraina vakili Budapesht memorandumining barcha tarafdorlarini hujjatning oltinchi moddasida ko‘zda tutilganidek, Ukrainaning mavjud chegaralariga ochiqdan-ochiq tajovuz qilish bo‘yicha zudlik bilan konsultatsiyalar o‘tkazishga da’vat etdi.
Nashr eslatishicha, avvalroq Putin Donbassning Ukrainaga berilishini ahmoqlik deb atagan edi.
Izoh (0)