AQShning Kaliforniya shtatidagi Santa-An qamoqxonasidan o‘ta xavfli jinoyatchi —Husayn Noyeriy qochib ketdi. Bu haqda Oranaj okrugi bosh prokurori o‘rinbosari Xizer Braun ma’lum qildi, deya xabar beradi “TASS”.
Xizer Braun vahshiyona jinoyatlarga qo‘l urgani uchun qochoqni “Qo‘zichoqlar sukuti” filmidagi Gannibal Lekterga qiyoslagan va “ular ikkinchi Gannibal Lekterni qochirib yuborishdi”, degan.
Prokuror ma’lumotlariga ko‘ra, 22-yanvar, juma kuni qamoqxonadan ikki sherigi bilan qochgan Husayn Eronda tug‘ilgan bo‘lib, Amerikaga qochib o‘tgan va bu yerda dengiz piyodalari korpusida tahsil olgan. U odam o‘g‘irlash, shafqatsiz usullar bilan qiynoqqa solish, ommaviy tartibsizliklarni keltirib chiqarishda ayblangan.
Xizer Braun bunday ashaddiy jinoyatchini odatiy tartibdagi umumiy kameraga joylashtirib, katta xatoga yo‘l qo‘yilganini ta’kidlamoqda. Federal qidiruv byurosi (FQB) va Kaliforniya politsiyasi qurollangan va jiddiy xavf tug‘dirishi mumkin bo‘lgan jinoyatchilarni tutishda yordam beradigan ma’lumot uchun 50 ming dollar mukofot va’da qilgan.
Izoh (0)