Hindistonning Chennay shahrida yakuniga yetib borayotgan shaxmat bo‘yicha an’anaviy xalqaro turnir o‘zining hal qiluvchi pallasiga kirdi. Kecha, 24-yanvar kuni musobaqada 9-tur uchrashuvlari o‘tkazildi, deb xabar beradi “Olamsport”.
Mazkur xalqaro turnirda O‘zbekiston sharafini himoya qilayotgan Marat Jumayev ushbu turda juda ham muhim g‘alabani qo‘lga kiritdi. Jumayev oq donalarda rossiyalik Ivan Popovni taslim etdi. Popov musobaqaning ikkinchi tartib raqamli shaxmatchisi bo‘lib, mazkur turdan oldin Jumayev singari 6 ochkoga ega bo‘lib turgandi. Mazkur g‘alabadan keyin o‘zbekistonlik grossmeyster yana sovrinli o‘rinlar uchun kurashga qaytdi.
To‘qqizta uchrashuvda 6 ta g‘alaba, ikkita durang va bitta mag‘lubiyat qayd etgan Marat Jumayev 7 ochko bilan turnir jadvalida qo‘shimcha ko‘rsatkichlarga ko‘ra 4-o‘rinni egallab turibdi. Peshqadamlar ukrainalik Yuriy Solodovnichenko va rossiyalik Vladimir Belous hisobida 7,5 tadan ochko bor. Uchinchi o‘rinni 7 ochko bilan rossiyalik Mixail Mojarov band etgan.
Bugun, 25-yanvar kuni Marat Jumayev so‘nggi 10-tur uchrashuvida qora donalarda aynan rossiyalik Vladimir Belous bilan munosabatlariga oydinlik kiritib oladi. Agar ushbu partiyada Jumayev g‘alaba qozonsa, sovrinli o‘rinlardan birini aniq qo‘lga kiritadi.
Izoh (0)