Futbol bo‘yicha O‘zbekiston olimpiya terma jamoasi himoyachisi Maksimilian Fomin RedPen nashriga bergan intervyusida asosli tanqidni to‘g‘ri qabul qilishini aytib o‘tdi.
O‘zbekiston olimpiya terma jamoasi 2016-yilgi U-23 Osiyo chempionatida muvaffaqiyatsizlikka uchradi — Rio—2016 Olimpiada yo‘llanmasini qo‘lga kiritish vazifasi bilan musobaqaga yo‘l olgan o‘zbekistonlik futbolchilar Janubiy Koreya va Iroqqa qarshi dastlabki ikki o‘yindan keyinoq kurashdan chiqdi.
Iroqqa qarshi o‘yindan so‘ng terma jamoa himoyachisi Maksimilian Fomin Facebook’dagi sahifasida bir guruh ishqibozlarning tanqidiga javoban haqoratli post qoldirgan edi. Keyinroq futbolchi bu postini o‘chirib tashlab, qilmishi uchun uzr so‘radi. Fominning harakatlari yuzasidan uning onasi ham jamoatchilikka murojaat qildi.
“Biz futbol o‘ynay olamiz. Musobaqalarga vaqt o‘tkazish uchun emas, o‘zimizni ko‘rsatish uchun, bekorga kelmaganimizni isbotlash uchun boramiz. Biroq sportda har doim ham hammasi sen xohlaganchalik bo‘lavermaydi”, — dedi Fomin.
“‘Futbolchilarimiz o‘ynashni xohlamadi’ deb aytayotgan odamlar, ehtimol, shunchaki sport, futbol nimaligini tushunmaydigan kishilar bo‘lsa kerak. Ular bizning kundalik mashg‘ulotlarimiz, faoliyatimizdan bexabar. Bizning butun hayotimiz og‘ir mehnat va musobaqadan musobaqagacha, o‘yindan o‘yingacha bo‘lgan tayyorgarlikdan iborat”, — dedi futbolchi.
Izoh (0)