Qatarda davom etayotgan 23 yoshgacha bo‘lgan futbolchilar o‘rtasidagi Osiyo chempionatida barcha yarim final ishtirokchilari ma’lum bo‘ldi, deb xabar beradi “Olamsport”.
22-yanvar kuni Yaponiya va Qatar terma jamoalari chorak final uchrashuvida mos ravishda Eron hamda KXDRni mag‘lub etib, yarim finalga yo‘l olgandi.
Kecha, 23-yanvar oqshomida bu vazifani O‘zbekiston bilan bir guruhdan joy olgan Janubiy Koreya va Iroq terma jamoalari ham uddaladi.
Iroq chorak final bahsida qo‘shimcha bo‘limlarda BAA olimpiyachilarini 3:1 hisobida taslim etdi. Asosiy vaqtda tomonlar murosa ko‘chasini tanladi — 1:1.
Ikkinchi chorak final juftligida esa Janubiy Koreya terma jamoasi Iordaniyadan 1:0 hisobida ustun keldi. Endi 26-yanvar kuni o‘tkaziladigan yarim finalda Janubiy Koreya Qatar bilan, Yaponiya esa Iroq bilan final hamda Rio—2016 chiptasi uchun maydonga tushadi.
Chempionatning eng kuchli uch jamoasi Olimpiada yo‘llanmasiga ega bo‘ladi.
Eslatib o‘tamiz, O‘zbekiston olimpiya terma jamoasi bosh murabbiyi Samvel Babayan turnirdan oldin “Guruhimizdagi jamoalardan biri albatta Olimpiadaga yo‘l oladi”, degandi. O‘zbekiston aynan Janubiy Koreya va Iroqdan uchralgan mag‘lubiyatlar evaziga guruhda qolib ketdi.
Izoh (0)