Ҳиндистоннинг Ченнай шаҳрида якунига етиб бораётган шахмат бўйича анъанавий халқаро турнир ўзининг ҳал қилувчи палласига кирди. Кеча, 24 январь куни мусобақада 9-тур учрашувлари ўтказилди, деб хабар беради «Оламспорт».
Мазкур халқаро турнирда Ўзбекистон шарафини ҳимоя қилаётган Марат Жумаев ушбу турда жуда ҳам муҳим ғалабани қўлга киритди. Жумаев оқ доналарда россиялик Иван Поповни таслим этди. Попов мусобақанинг иккинчи тартиб рақамли шахматчиси бўлиб, мазкур турдан олдин Жумаев сингари 6 очкога эга бўлиб турганди. Мазкур ғалабадан кейин ўзбекистонлик гроссмейстер яна совринли ўринлар учун курашга қайтди.
Тўққизта учрашувда 6 та ғалаба, иккита дуранг ва битта мағлубият қайд этган Марат Жумаев 7 очко билан турнир жадвалида қўшимча кўрсаткичларга кўра 4-ўринни эгаллаб турибди. Пешқадамлар украиналик Юрий Солодовниченко ва россиялик Владимир Белоус ҳисобида 7,5 тадан очко бор. Учинчи ўринни 7 очко билан россиялик Михаил Можаров банд этган.
Бугун, 25 январь куни Марат Жумаев сўнгги 10-тур учрашувида қора доналарда айнан россиялик Владимир Белоус билан муносабатларига ойдинлик киритиб олади. Агар ушбу партияда Жумаев ғалаба қозонса, совринли ўринлардан бирини аниқ қўлга киритади.
Изоҳ (0)