So‘qir Dzya Xaysya va uning qo‘lsiz do‘sti Dzya Venchi 12 yil ichida taqir vodiyni chiroyli daraxtzorga aylantirdi, deya xabar bermoqda “Kulturologiya.ru”. Do‘stlar yosh emasligiga va ba’zi kundalik yumushlarni mustaqil ravishda bajara olmasligiga qaramay, birga bo‘lsa, haqiqiy kuchga ega bo‘ladi.
53 yoshli Xaysya chap ko‘zida katarakta bilan tug‘ilgan, 2000-yilda esa ishdagi baxtsiz hodisa tufayli, o‘ng ko‘zi ham ko‘rmay qolgan va butunlay ko‘rga aylangan. Uning tengdoshi Venchi esa uch yoshligida qo‘llaridan ayrilgan. Ular birgalikda qariyb 4 gektar yerni yam-yashil daraxtzorga aylantirishga qaror qildi.
Har kuni tonggi 7 da do‘stlar ishga otlanadi. Ularning do‘kondan ko‘chat sotib olishga pullari yo‘q, shu tufayli Xaysya va Venchi qalamchalarni o‘zlari o‘stirib-undiradi. Bir necha yil ichida do‘stlar yumushlarni o‘zaro uyg‘unlikda amalga oshirishni o‘rgandi: Venchi ko‘r Xaysyani yelkasiga ortib, daryodan o‘tkazib qo‘yadi, Xaysya esa yangi qalamchalarni olish uchun daraxtlarga tirmashib chiqadi; Venchi qalamchalarni nazorat qilib, ularni sug‘oradi, Xaysya esa ularni ekib chiqadi. Bunday ahil ishlash orqali do‘stlar 10 mingtadan ortiq daraxt ekishga muvaffaq bo‘ldi.
Xitoy yangiliklarida qahramonliklari yoritilgach, Xaysya va Venchi katta e’tibor va ko‘makka ega bo‘ldi: hatto, kimdir ikkala do‘stni umrlari oxirigacha pensiya bilan ta’minlash uchun pul xayriya qildi. Shuningdek, Xaysyaning chap ko‘zini operatsiya qilish haqida taklif ham tushdi.
Izoh (0)