AQShdagi Nicklaus Children’s Hospital kasalxonasi pediatr jarrohlari Google Cardboard virtual reallik ko‘zoynagi yordamida chaqaloq qizchaning yuragini operatsiya qildi, deya xabar bermoqda TJournal. Ular ushbu ko‘zoynak orqali, operatsiya qilinadigan organlarning aniq 3D-modellaridan foydalandi.
Yurak va o‘pkaning magnit-rezonans tomografiyasi orqali olingan ikki o‘lchamli suratlari juda xira bo‘lgani va yetarlicha batafsil emasligi tufayli, chaqaloq organlari ustida xatosiz harakatlarni amalga oshirish uchun yaroqsiz edi.
Shunda MRT bo‘limi rahbari doktor Xuan-Karlos Munits yassi suratlardan foydalanib, chaqaloq organlarining 3D-modelini yasadi va uni Sketchfab yordamida iPhone’ga yukladi. Shifokor smartfonni Google Cardboard ko‘zoynagiga joyladi va shu tariqa, operatsiyadan ikki hafta avval chaqaloq organlari tuzilishini batafsil o‘rganib chiqdi.
Operatsiyaning o‘zini dekabr oxirida yetti soat davomida o‘tkazishdi, u muvaffaqiyatli kechdi.
Izoh (0)