Misr Arab Respublikasining Xurgada shahrida joylashgan Bella Vista Resort mehmonxonasiga 8-yanvar, juma kuni kechqurun qurolli hujum uyushtirildi, deya xabar bermoqda “TASS”. Hujum natijasida yevropalik uch sayyoh jarohat oldi. Hujum qilganlardan biri o‘ldirildi, ikkinchisi og‘ir yaralandi va hibsga olindi.
Uch yulduzli Bella Vista Resort mehmonxonasiga qilingan hujum terrorchilik harakati emas, qurolli bosqinchilikka urinish edi, dedi Misr sayyohlik vaziri Xisham Zaazu.
Mamlakat ichki ishlar vazirligi ma’lumotlariga ko‘ra, pichoqlar va signal to‘pponchasi bilan qurollangan ikki yosh yigit mehmonxonaga uning yaqinida joylashgan restoran orqali kirgan. Ular odamlarni sovuq qurol bilan qo‘rqita boshlagan, ammo zudlik bilan yetib kelgan soqchilar yashirinishga uringan hujumchilarni ta’qib qilishni boshlagan.
Hujumdan so‘ng harbiylar Xurgadaga kirish joylarining barchasini to‘liq yopib tashladi. Shaharda favqulodda holat e’lon qilindi va xavfsizlik choralari ancha kuchaytirildi. Shuningdek, mamlakatning boshqa kurort shaharlarida ham, birinchi navbatda mehmonxonalarda, kuchaytirilgan soqchilik va xavfsizlik choralari joriy etildi.
Izoh (0)