Мисрнинг Хургада шаҳридаги меҳмонхонага ҳужум уюштирилди

Миср Араб Республикасининг Хургада шаҳрида жойлашган Bella Vista Resort меҳмонхонасига 8 январь, жума куни кечқурун қуролли ҳужум уюштирилди, дея хабар бермоқда «ТАСС». Ҳужум натижасида европалик уч сайёҳ жароҳат олди. Ҳужум қилганлардан бири ўлдирилди, иккинчиси оғир яраланди ва ҳибсга олинди.

Уч юлдузли Bella Vista Resort меҳмонхонасига қилинган ҳужум террорчилик ҳаракати эмас, қуролли босқинчиликка уриниш эди, деди Миср сайёҳлик вазири Хишам Заазу.

Мамлакат ички ишлар вазирлиги маълумотларига кўра, пичоқлар ва сигнал тўппончаси билан қуролланган икки ёш йигит меҳмонхонага унинг яқинида жойлашган ресторан орқали кирган. Улар одамларни совуқ қурол билан қўрқита бошлаган, аммо зудлик билан етиб келган соқчилар яширинишга уринган ҳужумчиларни таъқиб қилишни бошлаган.

Ҳужумдан сўнг ҳарбийлар Хургадага кириш жойларининг барчасини тўлиқ ёпиб ташлади. Шаҳарда фавқулодда ҳолат эълон қилинди ва хавфсизлик чоралари анча кучайтирилди. Шунингдек, мамлакатнинг бошқа курорт шаҳарларида ҳам, биринчи навбатда меҳмонхоналарда, кучайтирилган соқчилик ва хавфсизлик чоралари жорий этилди.