Yangi yil bayrami ko‘ngildagidek o‘tishini ta’minlash borasida O‘zbekiston bo‘ylab keng ko‘lamli ishlar amalga oshirilmoqda. Bu haqda O‘zbekiston Respublikasi Ichki ishlar vazirligi inson huquqlarini himoya qilish va yuridik ta’minlash boshqarmasi boshlig‘i Ilhom Turg‘unov O‘zAga ma’lum qildi.
“Tumanlar, mahallalar va korxonalarda hushyorlik va ogohlikka chorlovchi targ‘ibot tadbirlari tashkil etilmoqda. Yurtimizning har bir go‘shasi, ayniqsa, bayram tadbirlari o‘tkaziladigan joylar soha xodimlarining alohida e’tiborida. Noxush holatlar yuzaga kelishiga yo‘l qo‘ymaslik, xavfsizlikni ta’minlash yuzasidan maxsus reydlar o‘tkazilayotir. Bu jarayonda mahalliy hokimliklar, jamoat tashkilotlari vakillari, xususan, mahalla fuqarolar yig‘inlari raislari, posbonlar faol ishtirok etmoqda. Tadbirlar davomida aniqlanayotgan kamchiliklar, huquqbuzarliklar o‘z vaqtida bartaraf etilayotir”, — dedi u.
“Tozalash” tadbiri davomida yetti millionga yaqin obyekt ko‘zdan kechirildi. Natijada 191 mingdan ortiq ma’muriy huquqbuzarlik aniqlandi. Jinoyat sodir etib qidiruvda yurgan shaxslar ushlandi.
Aholi punktlari, iqtisodiyot tarmoqlari va ijtimoiy soha obyektlarida yong‘in xavfsizligi tadbirlari yanada kuchaytirildi. Soha xodimlari aholi o‘rtasida yong‘in xavfsizligi qoidalariga rioya etish yuzasidan tushuntirish ishlarini olib bormoqda.
Bayram tadbirlari o‘tkaziladigan maydonlar atrofidagi yo‘llar va yo‘l belgilari ko‘zdan kechirilib, kamchiliklar bartaraf etilmoqda.
Yangi yil arafasida va bayram kunlari mamlakatga pirotexnika vositalari kirib kelishi va sotilishining oldini olish bo‘yicha ham zarur chora-tadbirlar ko‘rilmoqda.
Izoh (0)