Rossiya prezidenti Vladimir Putin Checheniston rahbari Ramzan Qodirovning respublikaga ikki yirik neft qazib oluvchi aktivlaridan biri — “Chechennefteximprom”ni berish to‘g‘risidagi taklifini qo‘llab-quvvatladi. Prezidentning bu boradagi ko‘rsatmasi va tegishli hujjat loyihalari hukumat tomonidan ko‘rib chiqilmoqda, deya xabar beradi “RBK”.
Hozirda “Chechennefteximprom” to‘liq Rossiya davlat mulkini boshqarish federal agentligiga (Rosimushestvo) tegishli, uni ijara asosida “Rosneft” kompaniyasi boshqaradi. Ramzan Qodirov davlat rahbariga yo‘llagan maktubida “Chechennefteximprom”ning neft qazib olish bilan bog‘liq bo‘lmagan imkoniyatlari — yer zaxiralari va infrastrukturasi deyarli foydalanilmayotgani, chechen rahbariyati bu yerda 2014-yili tuzilgan shartnomaga muvofiq Koreyaning KOKAM kompaniyasi bilan hamkorlikda litiy-ionli akkumulyatorlar ishlab chiqarish zavodini qurish niyatida ekanini bildirgan.
Qodirov “Chechennefteximprom” 2014–2016-yillarning xususiylashtirish prognoz rejasiga kiritilgani mazkur va kelgusi yillarga mo‘ljallangan boshqa loyihalarni amalga oshirishni shubha ostiga qo‘yishini ta’kidlab, ushbu tuzilmani respublika ixtiyoriga berishni so‘ragan.
Izoh (0)