Incheondagi Osiyo o‘yinlarida Janubiy koreyalik suzuvchilar qo‘lga kiritgan bronza O‘zbekistonga olib berildi

2014-yilning 19-sentabr – 4-oktabr kunlari Janubiy Koreyaning Incheon shahrida o‘tkazilgan XVII Osiyo o‘yinlarida suzish bo‘yicha O‘zbekiston erkaklar terma jamoasi a’zolari 4x100 metr masofaga erkin usulda suzish musobaqasida to‘rtinchi o‘rinni egallagan edi, deb yozadi O‘zbekiston Milliy olimpiya qo‘mitasi matbuot xizmati.

Osiyo o‘yinlari yakuniga yetgach, sportchilardan olingan doping testlar yana bir karra qayta tekshirildi va erkin usulda suzish musobaqasida uchinchi o‘rinni egallagan Janubiy Koreya jamoasi a’zolarida taqiqlangan dori vositalarini iste’mol qilinganligi aniqlangan.

Shundan so‘ng Osiyo olimpiya kengashi uchinchi o‘rinni egallagan Janubiy Koreya terma jamoasining natijalarini bekor qildi va erkin usulda suzish musobaqalaridagi bronza medalni O‘zbekiston terma jamoasi a’zolariga berish to‘g‘risida qaror qabul qildi.

Kecha, 3-dekabr kuni O‘zbekiston Milliy olimpiya qo‘mitasida suzish bo‘yicha O‘zbekiston erkaklar terma jamoasi a’zolariga Osiyo o‘yinlarining bronza medalini topshirish marosimi bo‘lib o‘tdi. Suzish bo‘yicha O‘zbekiston erkaklar terma jamoasi a’zolari Vladislav Mustafin, Aleksey Derlyugov, Dmitriy Shvetsov, Daniil Bukin, Xurshid Tursunov, Daniil Tulupov va Islom Aslanovga Osiyo o‘yinlarining bronza medallari tantanali suratda topshirildi.