2014 йилнинг 19 сентябрь – 4 октябрь кунлари Жанубий Кореянинг Инчеон шаҳрида ўтказилган ХVII Осиё ўйинларида сузиш бўйича Ўзбекистон эркаклар терма жамоаси аъзолари 4х100 метр масофага эркин усулда сузиш мусобақасида тўртинчи ўринни эгаллаган эди, деб ёзади Ўзбекистон Миллий олимпия қўмитаси матбуот хизмати.
Осиё ўйинлари якунига етгач, спортчилардан олинган допинг тестлар яна бир карра қайта текширилди ва эркин усулда сузиш мусобақасида учинчи ўринни эгаллаган Жанубий Корея жамоаси аъзоларида тақиқланган дори воситаларини истеъмол қилинганлиги аниқланган.
Шундан сўнг Осиё олимпия кенгаши учинчи ўринни эгаллаган Жанубий Корея терма жамоасининг натижаларини бекор қилди ва эркин усулда сузиш мусобақаларидаги бронза медални Ўзбекистон терма жамоаси аъзоларига бериш тўғрисида қарор қабул қилди.
Кеча, 3 декабрь куни Ўзбекистон Миллий олимпия қўмитасида сузиш бўйича Ўзбекистон эркаклар терма жамоаси аъзоларига Осиё ўйинларининг бронза медалини топшириш маросими бўлиб ўтди. Сузиш бўйича Ўзбекистон эркаклар терма жамоаси аъзолари Владислав Мустафин, Алексей Дерлюгов, Дмитрий Швецов, Даниил Букин, Хуршид Турсунов, Даниил Тулупов ва Ислом Аслановга Осиё ўйинларининг бронза медаллари тантанали суратда топширилди.
Изоҳ (0)