Shu yilning 1-dekabridan 7-dekabrigacha Britaniya Kengashi, O‘zbekiston Respublikasi Oliy va o‘rta maxsus ta’lim vazirligi hamda London Metropolitan universiteti tomonidan oliy ta’lim muassalarida eng zamonaviy axborot va kommunikatsion texnologiyalardan foydanlangan holda yetakchi pedagogik jamoa malakasini oshirish bo‘yicha seminar o‘tkaziladi. Bu haqda Britaniya Kengashi “Daryo”ga xabar berdi.
Seminarda AKT vositalarini bosqichma-bosqich ravishda oliy ta’lim tizimiga joriy etish uchun qo‘llanmalar ishlab chiqiladi. Tadbir Oliy ta’lim tizimi pedagog va rahbar kadrlarini qayta tayyorlash va ularning malakasini oshirishni tashkil etish Bosh ilmiy-metodik markazida bo‘lib o‘tmoqda.
Mazkur seminar ta’lim tizimidagi boshqaruvda, ta’lim jarayonida zamonaviy axborot resurslaridan foydalanish, soha vakillarining kasbiy mahoratini oshirish va bilimlarni baholashda AKTning ko‘llanilishi borasidagi eng ilg‘or milliy va xalqaro tajribalar bilan tanishishga imkoniyat beradi.
Loyihadan ko‘zlangan maqsad zamonaviy AKT vositalarini ta’lim sifatini ta’minlash jarayonida joriy etishdir.
Milliy mutaxassilar bilan hafta mobaynida AKT va ta’lim sohasida Buyuk britaniyalik ekspert Sharlotta Fregona o‘z tajribasi bilan o‘rtoqlashadi.
Dastur O‘zbekistonning barcha oliy o‘quv yurtlarini o‘z ichiga qamrab oladi. Uning ishtirokchilari esa oliy o‘quv yurtlarini boshqaruv vakillari, 60 rektor, 300 prorektor, o‘qituvchilar, 15 000 dan ortiq talabalar, ish beruvchilar, AKT sohasidagi mutaxasislar va kompaniyalaridir.
Izoh (0)