Toshkent shahrida, Qoraqalpog‘iston Respublikasida va O‘zbekistonning barcha viloyatlarida 2016—2020-yillar davomida 14 ta oliy mahorat sport maktablari tashkil etiladi. Bu O‘zbekiston Prezidenti tomonidan 23-noyabr kuni imzolangan qarorda nazarda tutilgan, deyiladi “Gazeta.uz” xabarida.
Qaror jahon sport maydonlari — Olimpiya va Osiyo o‘yinlarida, jahon va Osiyo chempionatlarida, boshqa xalqaro musobaqalarda O‘zbekiston sharafini munosib himoya qilishga qodir bo‘lgan xalqaro darajadagi sportchilarni tayyorlash bo‘yicha samarali tizimni yaratish maqsadida qabul qilingan.
Zamonaviy anjom va uskunalar bilan ta’minlangan yangi maktablar bazasida milliy terma jamoalar va ularning zaxiralarining o‘quv-mashg‘ulot yig‘inlari, shuningdek, respublika va mintaqaviy sport musobaqalari o‘tkaziladi.
O‘zbekiston Madaniyat va sport ishlari vazirligiga hisobot beruvchi maktablarning ixtisoslashuvi “mintaqalarda shakllangan sport maktablari va an’analari, murabbiy-o‘qituvchilar tarkibi hamda erishilgan sport yutuqlari bilan belgilanadi”:
- Nukus — sport kurash;
- Andijon — boks;
- Buxoro — gimnastika;
- Jizzax — boks;
- Qarshi — dzyudo;
- Navoiy — suv sport turlari;
- Namangan — velosport (shosse, trek);
- Samarqand — yengil atletika;
- Termiz — sport yakkakurashlari;
- Guliston — tennis va stol tennisi;
- Toshkent viloyati — o‘q otish;
- Farg‘ona — taekvondo WTF;
- Urganch — og‘ir atletika;
- Toshkent — o‘yin sport turlari.
Madaniyat va sport ishlari vazirligiga yangi sport maktablarini yetakchi xorijiy mutaxassislarni jalb qilgan holda yuqori malakli murabbiy-o‘qituvchilar tarkibi bilan to‘ldirish vazifasi yuklatilgan.
Izoh (0)