Amerika Qo‘shma Shtatlarining Xyuston shahrida og‘ir atletika bo‘yicha kattalar o‘rtasida o‘tkazilgan jahon chempionati yakuniga yetdi, deb xabar beradi O‘zbekiston Milliy olimpiya qo‘mitasi matbuot xizmati.
Dunyoning 98 davlati vakillari ishtirokida bo‘lib o‘tgan mazkur jahon chempionatida jahonning bugungi kundagi eng kuchli shtangachilari aniqlanishi bilan birga, 2016-yili Rio-de-Janeyro shahri (Braziliya)da o‘tkaziladigan XXXI yozgi Olimpiada o‘yinlarining yo‘llanmalari ham o‘ynaldi.
Sportning ushbu turida Olimpiada o‘yinlarining yo‘llanmalari so‘nggi ikki jahon chempionatida terma jamoalarning qayd etgan natijalariga ko‘ra taqsimlanadi.
Jumladan, umumjamoa hisobida 1—6-o‘rinni egallagan terma jamoalarga 6 tadan, 7—12-o‘rinlarni band etgan termalarga 5 tadan, 13—18-o‘rinlarga sazovor bo‘lganlarga 4 tadan va nihoyat 19—24-o‘rinni egallagan terma jamoalarga 3 tadan yo‘llanma beriladi.
2014-yili Qozog‘istonning Olmaota shahrida hamda joriy yil Xyuston shahri (AQSh)da bo‘lib o‘tgan jahon chempionatlarining yakuniga ko‘ra 8-o‘rinni egallagan O‘zbekiston erkaklar terma jamoasi Rio—2016 o‘yinlariga bir yo‘la 5 ta yo‘llanmani qo‘lga kiritdi.
Okean ortida bo‘lib o‘tgan jahon chempionatida O‘zbekiston terma jamoasi muvaffaqiyatiga Ivan Yefremov (-105 kg, dast ko‘tarishda 192 kg natija bilan oltin medal), Sardorbek Do‘stmurodov (-105 kg, siltab ko‘tarishda 228 kg natija bilan bronza medal), Ulug‘bek Alimov (-85 kg), Muhammad Begaliyev (-85 kg), Rustam Djangabayev (+105 kg), Adhamjon Ergashev (-62 kg) va Farhodbek Sobirov (-94 kg) munosib hissa qo‘shdi.
Izoh (0)