Тошкент шаҳрида, Қорақалпоғистон Республикасида ва Ўзбекистоннинг барча вилоятларида 2016—2020 йиллар давомида 14 та олий маҳорат спорт мактаблари ташкил этилади. Бу Ўзбекистон Президенти томонидан 23 ноябрь куни имзоланган қарорда назарда тутилган, дейилади «Газета.uz» хабарида.
Қарор жаҳон спорт майдонлари — Олимпия ва Осиё ўйинларида, жаҳон ва Осиё чемпионатларида, бошқа халқаро мусобақаларда Ўзбекистон шарафини муносиб ҳимоя қилишга қодир бўлган халқаро даражадаги спортчиларни тайёрлаш бўйича самарали тизимни яратиш мақсадида қабул қилинган.
Замонавий анжом ва ускуналар билан таъминланган янги мактаблар базасида миллий терма жамоалар ва уларнинг захираларининг ўқув-машғулот йиғинлари, шунингдек, республика ва минтақавий спорт мусобақалари ўтказилади.
Ўзбекистон Маданият ва спорт ишлари вазирлигига ҳисобот берувчи мактабларнинг ихтисослашуви «минтақаларда шаклланган спорт мактаблари ва анъаналари, мураббий-ўқитувчилар таркиби ҳамда эришилган спорт ютуқлари билан белгиланади»:
- Нукус — спорт кураш;
- Андижон — бокс;
- Бухоро — гимнастика;
- Жиззах — бокс;
- Қарши — дзюдо;
- Навоий — сув спорт турлари;
- Наманган — велоспорт (шоссе, трек);
- Самарқанд — енгил атлетика;
- Термиз — спорт яккакурашлари;
- Гулистон — теннис ва стол тенниси;
- Тошкент вилояти — ўқ отиш;
- Фарғона — таэквондо WTF;
- Урганч — оғир атлетика;
- Тошкент — ўйин спорт турлари.
Маданият ва спорт ишлари вазирлигига янги спорт мактабларини етакчи хорижий мутахассисларни жалб қилган ҳолда юқори малакли мураббий-ўқитувчилар таркиби билан тўлдириш вазифаси юклатилган.
Изоҳ (0)