“Jahon” axborot agentligining fotomuxbiri Anvar Ilyosov an’anaviy tarzda o‘tkazib kelinadigan “Energiya pobed” sport jurnalistikasi festival-tanlovida “Eng yaxshi fotoreportajlar” nominatsiyasida bosh sovrinni qo‘lga kiritdi. Bu haqda O‘zbekiston Milliy olimpiya qo‘mitasining matbuot xizmati xabar bermoqda.
Tajribali fotomuxbir ko‘p yillardan buyon O‘zbekiston sport delegatsiyasi tarkibida Olimpiada va Osiyo o‘yinlarida, shuningdek, turli darajadagi xalqaro musobaqalarda bevosita ishtirok etib, voqea joyidan fotoreportajlar tayyorlab keladi.
O‘zbek sportchilarining zafarli onlaridan tayyorlangan fotoreportajlar “Energiya pobed” festival-tanlovida hakamlar tomonidan eng yuqori bahoga loyiq topildi va Ilyosov “Eng yaxshi fotoreportajlar” nominatsiyasida g‘oliblikka erishdi.
Eslatib o‘tamiz, dastlab o‘tkazilgan saralash bosqichidan Anvar Ilyasov bilan birga yana ikki nafar ijodkor, bular – Fransiyaning Agence France-Presse agentligidan Kirill Kudryavsev hamda Avstriyaning “Biathlonworld.com” portali xodimi Yevgeniy Tumashov muvaffaqiyatli o‘tib, g‘oliblikka da’vogarlar ro‘yxatidan o‘rin egallagan edi.
Hal qiluvchi bosqichda ham hakamlar Anvar Ilyasovning fotoreportajlarini eng yaxshi deb topdi va u o‘z nominatsiyasida birinchi o‘rinni egalladi. Ushbu nominatsiyada ikkinchi o‘ringa Yevgeniy Tumashev sazovor bo‘lgan bo‘lsa, Kirill Kudryavsevga uchinchi o‘rin nasib etdi.
Barcha (jami 11 ta nominatsiya) g‘olib va sovrindorlarga mukofotlar tantanali ravishda topshirildi.
Ma’lumot uchun. Bu yilgi festival-tanlovga RFning 62 hududi hamda 10 davlatdan jami 302 ta ijodiy ishlar yuborilgan.
Izoh (0)