Ozarbayjon poytaxti Boku shahrida erkin va yunon-rum kurashi bo‘yicha Haydar Aliyev xotirasiga bag‘ishlangan Oltin Gran-pri musobaqasi yakunlandi. Ushbu nufuzli turnirda O‘zbekiston terma jamoasi a’zolari ham ishtirok etdi, deb xabar qiladi “Olamsport”.
Musobaqaning so‘nggi kuni yunon-rum kurashi ustalari o‘z imkoniyatlarini sinovdan o‘tkazdi. 59 kg vazn toifasida gilamga chiqqan jahon chempionatining bronza medali sovrindori Elmurot Tasmurodov finalgacha mag‘lubiyatsiz yetib borib, kumush medalga sazovor bo‘ldi.
O‘zbekistonlik kurashchi saralash bahslarida eronlik Mehrad Mardani, yaponiyalik Kenichiro Fumitoni mag‘lub etdi. Yarim finalda AQSh vakili Jess Tilkidan ustun keldi. Ammo final uchrashuvida bu yilgi jahon chempionati bronza medali sovrindori qozog‘istonlik Almat Kebispayevga 0:8 hisobida imkoniyatni boy berib, kumush medal bilan taqdirlandi.
Eslatib o‘tamiz, Oltin Gran-Pri turnirining ilk kuni o‘zbekistonlik erkin kurashchi Bekzod Abdurahmonov 70 kg vazn toifasida oltin medalni qo‘lga kiritgan edi.
Izoh (0)