Озарбайжон пойтахти Боку шаҳрида эркин ва юнон-рум кураши бўйича Ҳайдар Алиев хотирасига бағишланган Олтин Гран-при мусобақаси якунланди. Ушбу нуфузли турнирда Ўзбекистон терма жамоаси аъзолари ҳам иштирок этди, деб хабар қилади «Оламспорт».
Мусобақанинг сўнгги куни юнон-рум кураши усталари ўз имкониятларини синовдан ўтказди. 59 кг вазн тоифасида гиламга чиққан жаҳон чемпионатининг бронза медали совриндори Элмурот Тасмуродов финалгача мағлубиятсиз етиб бориб, кумуш медалга сазовор бўлди.
Ўзбекистонлик курашчи саралаш баҳсларида эронлик Меҳрад Мардани, япониялик Кеничиро Фумитони мағлуб этди. Ярим финалда АҚШ вакили Жесс Тилкидан устун келди. Аммо финал учрашувида бу йилги жаҳон чемпионати бронза медали совриндори қозоғистонлик Алмат Кебиспаевга 0:8 ҳисобида имкониятни бой бериб, кумуш медаль билан тақдирланди.
Эслатиб ўтамиз, Олтин Гран-При турнирининг илк куни ўзбекистонлик эркин курашчи Бекзод Абдураҳмонов 70 кг вазн тоифасида олтин медални қўлга киритган эди.
Изоҳ (0)