O‘zbekiston Qizil Yarim oy jamiyati qoshidagi “Mehr-shafqat xizmati” guruhining 16 nafar shafqat hamshiralari Samarqand viloyatining turli hududlarida istiqomat qiluvchi 200 ga yaqin yolg‘iz va nogiron keksalarga 38 million so‘mlik ijtimoiy va tibbiy xizmat ko‘rsatdi. Bu haqda “Zarafshon” gazetasi xabar bermoqda.
Shuningdek, 57 nafar keksalarning holidan xabar olinib, ularga oziq-ovqat mahsulotlari, issiq kiyim-kechak tarqatildi. Viloyat, tumanlar tashkilotlari tomonidan moddiy muhtojlarga pul, dori-darmon va bayramlar munosabati bilan sovg‘alar ulashildi.
Qayd etishlaricha, viloyat tashkilotida faoliyat olib borayotgan ko‘ngillilardan iborat qutqaruv guruhi a’zolari soni 110 nafarga yetdi. Shuningdek, viloyat bo‘yicha 36 ta sanitariya drujinalari, 514 ta sanitariya postlari hamda 30 dan ortiq Favqulodda vaziyatlarga tayyorgarlik ko‘rish markazlar tashkil etilgan.
“Viloyat favqulodda vaziyatlar boshqarmasi tomonidan viloyatning Bulung‘ur, Kattaqo‘rg‘on va Paxtachi tumanlarida o‘tkazilgan o‘quv mashg‘ulotlarida Qizil Yarim oy jamiyati o‘zining sanitariya drujinalari bilan ishtirok etdi. Shuningdek, favqulodda vaziyatlarda ko‘chirilgan aholiga muruvvat yordami sifatida oziq-ovqat va kiyim-kechak tarqatildi”, — deyiladi gazeta xabarida.
Favqulodda vaziyatlar qachon, qayerda ro‘y bergani, qancha aholi ko‘chirilganiga gazeta xabarida aniqlik kiritilmagan.
Izoh (0)