Samarqand shahrida fuqarolik holati dalolatnomalarini yozish bo‘limlari hamda davlat notarial idoralarining yangi binolari foydalanishga topshirildi. Bu haqda “Zarafshon” gazetasi xabar bermoqda.
Xabar berishlaricha, shaharda kuni kecha 3-son FHDYo bo‘limi va 7-son davlat notarial idorasining yangidan qurilgan, 4-son FHDYo bo‘limi va 4-son Davlat notarial idoralarining to‘liq ta’mirlangan binolari foydalanishga topshirildi.
Yangi binoda nikohni tantanali qayd etish, ya’ni marosimlar zali, kelin-kuyovlar uchun tegishli huquqiy va tibbiy maslahatlar beriladigan “Oila dorulfununi”, hujjatlarni saqlash va boshqa xonalar zamonaviy axborot texnologiyalari va mebel jihozlari bilan to‘liq jihozlangan.
Ma’lumot uchun, FHDYo bo‘limlari va davlat notarial idoralari moddiy-texnik bazasini mustahkamlash bo‘yicha 2015-yilga mo‘ljallangan dasturga asosan Samarqand viloyatida 11 loyiha tasdiqlangan bo‘lib, shundan beshtasi yangidan qurildi, yana beshtasi to‘liq ta’mirlandi.
Izoh (0)