Oktabr oyida Saudiya Arabistoni Rossiyani chetga surib, Xitoy neft bozoridagi yetakchilikni qaytarib oldi. Rossiya Xitoyga xom neft yetkazib beruvchilar orasida Angolani ham oldinga o‘tkazib yuborib, uchinchi o‘ringa tushib qoldi. Bu 23-noyabr, dushanba kuni e’lon qilingan Xitoy bojxona bosh boshqarmasining oktabr oyi hisobotida ma’lum bo‘ldi, deya xabar beradi “RBK”.
Hisobotga ko‘ra, Saudiya Arabistoni Xitoyga oktabrda 3,99 million tonna neft eksport qilgan, bu sentabr ko‘rsatkichlariga nisbatan 0,8 foizga ko‘p. Angola 3,64 million, Rossiya esa 3,41 million tonna eksportni amalga oshirgan. Angola yetkazib berish hajmini 27 foizga oshirgan, Rossiyada esa, aksincha, eksport 16 foizga pasaygan.
Joriy yil davomida Saudiya Arabistoni ikki bor (may va sentabrda) Xitoyga neft yetkazib berish bo‘yicha birinchilikni Rossiyaga boy bergandi. Biroq yillik ko‘rsatkichlarni inobatga olganda, mazkur mamlakat Xitoy neft bozorida 15 foizlik ulushga ega xomashyoning eng yirik eksportchisi sanaladi. Angola va Rossiya esa Xitoyga neftning 12 foizini yetkazib beradi.
Izoh (0)