2015-yilning 2-noyabr kuni O‘zbekiston Respublikasi tashqi ishlar Vaziri Abdulaziz Kamilov O‘zbekistonga tashrif buyurgan Italiya Respublikasining Tashqi ishlar va xalqaro hamkorlik vazirligi bosh kotibi Mikele Valensizeni qabul qildi. Bu haqda O‘zbekiston TIV matbuot xizmati xabar bermoqda.
Suhbat chog‘ida ko‘p qirrali O‘zbekiston—Italiya munosabatlarini rivojlantirish, xalqaro tashkilotlar, avvalo BMT va uning tuzilmalari doirasidagi hamkorlik istiqbollari muhokama qilindi.
Uchrashuvda O‘zbekiston tomoni BMT Xafvsizlik kengashining 2017—2018-yillardagi nodoimiy a’zoligi uchun bo‘ladigan saylovlarda Italiya nomzodini qo‘llab-quvvatlashini tasdiqladi.
Savdo-iqtisodiy va investitsion hamkorlikni chuqurlashtirish masalalariga alohida e’tibor qaratildi. 5—6-noyabr kunlari bo‘lajak Toshkent Xalqaro investitsiya forumida mashinasozlik, energetika va boshqa ishlab chiqarish sohalariga ixtisoslashgan yetakchi Italiya kompaniyalari vakillarining ishtirok etishi ikki davlat ishbilarmon doiralari o‘rtasida qo‘shma loyihalarni amalga oshirishga yo‘naltirilgan aloqalarni faollashtirishga bo‘lgan o‘zaro qiziqish ortganligini tasdiqlaydi.
Shu bilan birga O‘zbekiston va Italiya o‘quv muassasalari o‘rtasida to‘g‘ridan-to‘g‘ri aloqalarni o‘rnatishda ijobiy malaka to‘planganligi e’tirof etildi.
Uchrashuvda ba’zi xalqaro va mintaqaviy masalalar yuzasidan ham fikr almashildi.
Shu kunning o‘zida Toshkent shahrida O‘zbekiston—Italiya tashqi ishlar vazirliklari o‘rtasidagi siyosiy maslahatlashuvlarining beshinchi raundi bo‘lib o‘tdi. Tadbir davomida ikki tomonlama va xalqaro ahamiyatga molik keng ko‘lamli masalalar ko‘rib chiqildi.
Qo‘shma tadbirlarda Italiya Elchisi Rikkardo Manara ishtirok etdi.
Izoh (0)