Toshkentda “Aholining huquq va qonuniy manfaatlarini himoya qilishda davlat organlarining fuqarolik jamiyati institutlari bilan o‘zaro hamkorligini rivojlantirishning dolzarb masalalari” mavzuida xalqaro konferensiya bo‘lib o‘tdi. Bu haqda Oliy Majlis Qonunchilik palatasi Axborot xizmati “Daryo”ga xabar berdi.
Unda Belgiya, Germaniya, AQSh hamda boshqa davlatlardan ekspertlar, shuningdek, Oliy Majlis palatalari, vazirliklar, idoralar, xalq deputatlari mahalliy Kengashlari, NNT, OAV, O‘zbekistonda akkreditatsiyadan o‘tgan diplomatik korpus va xalqaro tashkilotlar vakillari qatnashdi.
Anjuman O‘zbekiston parlamenti, Inson huquqlari bo‘yicha O‘zbekiston Respublikasi Milliy markazi, Fuqarolik jamiyati shakllanishini monitoring qilish mustaqil instituti, Nodavlat notijorat tashkilotlari milliy assotsiatsiyasi, Adliya vazirligi tomonidan YeXHT, F.Ebert nomidagi fond (Germaniya), USAID (AQSh) bilan hamkorlikda tashkil etildi.
Forumda O‘zbekistonda ijtimoiy sheriklik institutining yaratilishi, rivojlanishining ijtimoiy-siyosiy hamda qonunchilik asoslari, mamlakatni demokratik yangilash va modernizatsiyalashda fuqarolik jamiyati institutlarining roli hamda o‘rni haqida so‘z yuritilib, ijtimoiy ahamiyatga ega qonun loyihalarini tayyorlash va muhokama qilishda parlament hamda joylarda davlat hokimiyati vakillik organlarining NNT, fuqarolar o‘zini o‘zi boshqarish organlari va OAV bilan o‘zaro hamkorligi tamoyillari, shakllari hamda mezonlari tahlil qilindi. Ayni paytda qonuniylikni mustahkamlash, fuqarolar huquq va erkinliklarini muhofaza qilish sohasida huquq-tartibot organlari bilan fuqarolik jamiyati institutlarining o‘zaro aloqalari mexanizmi, ushbu jabhadagi xalqaro tajribaga alohida e’tibor qaratildi.
Anjuman yakunida aholining huquq va qonuniy manfaatlarini ishonchli himoya qilishni ta’minlash bo‘yicha davlat organlari hamda fuqarolik jamiyati institutlari o‘rtasidagi ijtimoiy sheriklikni yanada ravnaq toptirishga qaratilgan taklif va tavsiyalar ishlab chiqildi.
Izoh (0)