Европа комиссияси Мадриднинг «Реал» футбол клуби билан боғлиқ эҳтимолий коррупция можароси юзасидан тергов-суриштирув ҳаракатларини бошлади. Бу ҳақда «Sports.ru» хабар бермоқда.
Қироллик клуби ҳозирги вақтда 12 миллион еврога баҳоланаётган ерни бир неча йил аввал сотиш орқали 22 миллион евро ишлаб топган.
«Реал» 1998 йили янги машғулот марказини қуриш мақсадида ярим миллион евро эвазига Лас-Табласдаги ерни сотиб олганди. Бироқ, қонун бўйича, бу ерга хусусий компания эгалик қилиши мумкин эмаслиги сабаб, клуб ўз режаларини амалга ошира олмаган.
2011 йили «Реал» президенти Флорентино Перес «Сантьяго Бернабеу» стадионини кенгайтиришда кўмак беришни сўраб ҳукуматга мурожаат қилганида, Лас-Табласдаги ер билан боғлиқ масалани ҳам ижобий ҳал этишга муваффақ бўлган.
70815 квадрат метр майдон қайтиб шаҳар мулкига айланди, «Реал» мазкур савдодан 22 миллион евро ишлаб олди. Шунга қарамай, El Pais газетаси текширувида қайд этилишича, Лас-Табласдаги бу ер аслида 12 миллион еврога баҳоланмоқда.
Шундай қилиб, «Реал» ноқонуний равишда нархни оширган ва «ортиқча» 10 миллион еврони қўлга киритган. Агар Европа комиссияси мазкур савдонинг ноқонунийлигини исботласа, «Реал» ортиқча олинган пулни қайтариб беришга мажбур бўлади.
Изоҳ (0)