Xalqaro futbol federatsiyasi (FIFA) tashkilot prezidentligi saylovlarida ishtirok etish uchun yetti nafar nomzodning arizalarini ma’qulladi. Bu haqda Meduza xabar bermoqda.
FIFA matbuot xizmatining xabar berishicha, Iordaniya shahzodasi Ali bin al-Husayn, Musa Hasan Biliti, Jerom Shampan, Janni Infantino, Mishel Platini, shayx Salmon bin Ibrohim al-Xalifa va Tokio Seksvale saylovda nomzod sifatida qatnashish huquqini qo‘lga kiritdi.
Reuters agentligining qayd etishicha, UEFA rahbari Mishel Platiniga nisbatan joriy etilgan 90 kunlik diskvalifikatsiya muddati yakuniga yetmaguncha, saylov komissiyasi uning arizasini ko‘rib chiqmaydi.
FIFA prezidentligi uchun muddatidan avvalgi saylovlar 2016-yil fevralida bo‘lib o‘tishi kerak. Federatsiyaga 1998-yildan beri rahbarlik qilib kelayotgan Yozef Blatter korrupsiyaviy mojaro ortidan iste’foga chiqishga rozi bo‘lganidan so‘ng, saylovlar o‘tkazilishi e’lon qilingandi.
2015-yilning may oyida AQSh so‘rovi bilan Shveysariyada FIFAning yuqori martabali xodimlari, xususan, vitse-prezidenti hibsga olindi. Futbol amaldorlari korrupsiyaga aloqadorlikda gumon qilinmoqda.
2015-yilning sentabrida Shveysariya huquqni muhofaza qilish organlari Blatter mas’uliyatsizlik va mulkni noqonuniy yo‘l bilan o‘zlashtirishda gumon qilinayotganini ma’lum qildi. Tergov ma’lumotlariga ko‘ra, Blatter teletranslyatsiya huquqlarini sotish bo‘yicha qasddan FIFA uchun foydasiz bo‘lgan shartnomani imzolagan, shuningdek, UEFA rahbari Mishel Platinining hisob raqamiga noqonuniy ravishda ikki million frank pul o‘tkazgan. Blatter mazkur ayblovlarni rad etmoqda. Platini pul o‘tkazmasi holati bo‘lganini tan olib, bu pullar faqat FIFA bilan shartnoma asosida ishlab topilgan mablag‘ ekanligini ta’kidlamoqda. Oktabr oyi boshida FIFA Tartib-intizom qo‘mitasi Platini va Blatterni 90 kunga futboldan chetlatdi.
Platini FIFA prezidenti lavozimida Blatterning vorisi bo‘lishga asosiy nomzod, deb hisoblanmoqda.
Izoh (0)