Boshqirdistonda noma’lum shaxslar 7 kishini otib tashladi

Rossiya tarkibidagi Boshqirdiston Respublikasining Salavat shahrida noma’lum shaxslar yetti nafar mahalliy fuqaroni otib ketdi, deya xabar bermoqda LifeNews. Hodisa natijasida bir kishi halok bo‘ldi.

Bir guruh erkaklar kechki payt restorandagi ziyofatni yo‘l-transport hodisasiga uchragan tanishlariga yordam berish maqsadida tark etadi. Avtomobilni evakuatsiya qilish chog‘ida ularga uch noma’lum shaxs yaqin kelib, voqeani mobil telefonda videoga ola boshlaydi. Natijada dahanaki jang boshlanadi, noma’lum kishilardan biri rezina o‘qli to‘pponchasini olib, erkaklardan birining yuziga qarata bir necha marta o‘q uzadi.

Shundan so‘ng hujumkorlar voqea joyidan yashirinadi, jabrlanuvchi kasalxonaga yetkaziladi. Qolgan erkaklar “vaziyatni muhokama qilish uchun” jabrlanuvchiga tegishli avtoservisga qaytadi. Shunda bu yerga niqob kiygan noma’lum shaxslar bostirib kirib, o‘t ochadi.

Nizo natijasida yetti kishi og‘ir jarohatlar bilan kasalxonaga yotqizildi. Boshidan yaralangan erkak, avtoservis xo‘jayini shahar shifoxonasida hayotdan ko‘z yumdi.

Ushbu holat bo‘yicha jinoiy ish qo‘zg‘atildi.