“‘O‘zavtosanoat’ AK avtomobillari uchun butlovchi qismlarni mahalliylashtirish” ko‘rgazma-konferensiyasi o‘tkazilmoqda

2015-yilning 27-oktabridan 2-noyabrigacha  “O‘zEkspomarkaz” milliy ko‘rgazmalar majmuida Xalqaro sanoat yarmarkasi va kooperatsiya birjasiga hamohang  tarzda  “‘O‘zavtosanoat’ AK avtomobillari uchun butlovchi qismlarni mahalliylashtirish” ixtisoslashtirilgan ko‘rgazma-yarmarkasi  o‘tkazilmoqda. Bu haqda “O‘zavtosanoat” matbuot xizmati xabar berdi.

Mazkur tadbirni o‘tkazishdan ko‘zlangan asosiy maqsad mamlakatdagi tadbirkorlarning hamda  tadbirga katta qiziqish bildirgan boshqa sohalardagi korxona va  kompaniyalar vakillarining keng doirasini avtomobilsozlik tarmog‘idagi butlovchi qismlarni mahalliylashtirish jarayoniga, shuningdek, tarmoqlararo kooperatsiya va mustahkam hamkorlikni o‘rnatishga  jalb qilishdan iborat.

Ko‘rgazma ekspozitsiyasi ishtirokchilar e’tiboriga  avtomobillar uchun mo‘ljallangan  keng turdagi butlovchi qismlarni namoyish etishi ko‘zda tutilgan.

Mazkur konferensiyada ishtirok etish  GM Uzbekistan AJ, SamAvto MChJ, MAN Auto-Uzbekistan MChJ qo‘shma korxonasi,  General Motors Powertrain Uzbekistan AJ va  avtomobillar hamda  butlovchi qismlar ishlab chiqaruvchi  boshqa yirik kompaniyalarning shartlari va talablarini o‘rganish, ularning yirik yetkazib beruvchilariga  aylanish imkoniyatini beradi.