Samsung kompaniyasi yil oxiriga qadar ulkan Galaxy View planshetini taqdim etishi kutilmoqda. Bu haqda “Hi-tech.mail.ru” xabar berdi.
Riteylerlar katalogida yangi planshetga bag‘ishlangan sahifa paydo bo‘ldi. Samsung yangilikni planshet va televizor oralig‘idagi, uy bekalari va bolalar uchun ayniqsa qo‘l keladigan gadjet sifatida talqin etmoqda.
Galaxy View’ning texnik xususiyatlari quyidagilardan iborat: 18,4 dyuymli, 1920x1080 pikselli TFT displey, chastotasi 1,6 GGs bo‘lgan sakkiz yadroli Exynos 7580 protsessori, 2 GB tezkor va 32 GB doimiy xotira, 2,1 megapikselli old kamera, 802.11ac’gacha bo‘lgan Wi-Fi. Akkumulyator sig‘imi 5700 mAch, bu 8,5 soat davomida video ko‘rishga yetadi. Planshetning LTE modulli ko‘rinishi ham bo‘lishi mumkin.
Ishlab chiqaruvchi tomonidan taqdimot sanasi e’lon qilinmagan, biroq kompaniya yangi yil bayramlariga qadar sotuvga chiqarishga ulgurishi uchun Galaxy View’ni yil oxirigacha ko‘rsatishini kutsa bo‘ladi. Gadjet barcha bozorlarga mo‘ljallangani yoki cheklangan mamlakatlar uchun chiqarilishi haqida hozircha ma’lumot yo‘q.
AQSh bozorida 32 GB doimiy xotiraga ega SIM-karta uchun slotsiz gadjet 599 dollar turadi, boshqa davlatlarda narx bundan ham baland bo‘lishi mumkin.
Izoh (0)