“O‘zavtosanoat” Afrika va Janubiy Amerika davlatlariga mahsulot eksport qilishni boshladi

O‘zbekiston avtomobilsozlari Turkiyaga yuk avtomobillari va avtobuslar eksportini yo‘lga qo‘ydi. Bu haqda, O‘zbekiston Iqtisodiyot vazirligi va Davlat statistika qo‘mitasi axborotiga asoslanib, O‘zA xabar bermoqda.

Shuningdek, “O‘zavtosanoat” tizimidagi korxonalar Braziliyaga avtomobil chiroqlari, Janubiy Koreyaga avtomobil uchun butlovchi qismlar eskport qilinmoqda.

“Bundan tashqari, Afrika va Janubiy Amerikaning ilgari savdo munosabatlari o‘rnatilmagan 13 davlatiga (Angola, Uganda, Benin, Chad, Liberiya, Kamerun, Mavrikiy, Madagaskar, Somali, Markaziy Afrika Respublikasi, Dominikan Respublikasi) mineral o‘g‘it, kaolin, yengil avtomobillar va boshqa mahsulotlar eksport qilinmoqda”, — deyiladi O‘zA xabarida.

Eslatib o‘tamiz, O‘zbekiston avtomobil sanoatining asosiy eksport bozori hisoblangan Rossiyaning Moskva shahrida 8-oktabr kuni yangi — Ravon brendi taqdimoti bo‘lib o‘tgandi.