Rossiyaning Tambov viloyatida Opel va Chevrolet avtomobil modellarini sotish bilan shug‘ullanib kelgan “TAK-Finans” kompaniyasi General Motors’dan qariyb 683 million rubl talab qilmoqda. Bu haqda “RBK” xabar bermoqda.
Xabar berishlaricha, tegishli ariza 21-oktabr kuni Tambov viloyati arbitraj sudiga berilgan. Sud materiallarida da’vo mazmuni oshkor etilmagan.
Eslatib o‘tamiz, General Motors 2015-yilning mart oyida Rossiyadagi biznesini qisqartirishini e’lon qilgandi. 2015-yil oxirigacha korporatsiya Opel va Chevrolet avtomobillari savdosini to‘xtatishni rejalashtirmoqda, Kaliningrad va Sankt-Peterburgdagi ishlab chiqarish quvvatlari to‘xtatilgan.
Marka dilerlari uchun dilerlik tarmog‘ini rivojlantirishga tikilgan mablag‘larni qoplash uchun kompensatsiya to‘lovlari nazarda tutilgan, biroq General Motors’ning hamma hamkorlari ham kompensatsiya miqdoridan qoniqish hosil qilayotgani yo‘q.
Hozirgacha General Motors’ga nisbatan Opel va Chevrolet sotuvchi shirkatlardan umumiy qiymati 1 milliard rubldan ortiq to‘rtta da’vo tushdi. Da’volardan biri bo‘yicha, sud General Motors’ning Rossiyadagi sho‘basi hisob-raqamidagi 380 million rublni hibsga oldi.
General Motors’ga avtomobil ehtiyot qismlarini yetkazib beruvchi Rossiya kompaniyalari ham da’vo bilan chiqmoqda: shunday da’volarning birinchisini (qiymati 115 million rubl) “Avtokomponent” kompaniyasi berdi.
“TAK-Finans”ning ham talablarini qo‘shib hisoblaganda, Rossiyada General Motors’ga nisbatan da’volar hajmi 2 milliard rubldan oshib ketdi.
Izoh (0)